O Zinâ

Ediçion

E notiçie da-a Liguria

À Zena o Radun naçionale di Arpin, 400mia presense e polemiche

Zena a l’òspita o 97eximo Radun naçionale di Arpin con 90mia «ciumme neigre» e 400mia presense inte l’insemme in çittæ da-i 8 a-i 10 de mazzo. Un appontamento tornou dòppo 25 anni da l’urtima vòtta, ma con un carrego de polemiche ascì. Inta çittæ vegia l’é vegnuo feua de scrite che definivan i arpin «ascidiatoî» e «assascin». De assoçiaçioin feministe an spantegou di conseggi pe defendise da-e violense. A scindica Salis a l’à parlou in conseggio: «Che sta festa a no vëgne un scontro de trincea, e corpe de persoñe sence no devan ammacciâ unna communitæ intrega». Dapeu a l’à dito torna: «Son i benvegnui». In San Benardo à di arpin gh’é stæto tiou adòsso de arbanelle de veddro, un o l’à denonçiou d’ëse stæto contornou da de gente che gh’an arröbou a ciumma.

Traduçion italiaña

A Genova il Raduno nazionale degli Arpini, 400mila presenze e polemiche

Genova ospita la 97esima Adunata nazionale degli Alpini, con 90mila «penne nere» e un totale di 400mila presenze in città dall’8 al 10 maggio. Un appuntamento che ritorna dopo 25 anni dall’ultima volta, ma non senza un carico di polemiche. Nel centro storico sono comparse scritte che definivano gli alpini «molestatori» e «assassini». Alcune associazioni femministe hanno diffuso consigli per difendersi dalle violenze. La sindaca Salis è intervenuta in consiglio: «Che questa festa non si trasformi in uno scontro di trincea, le colpe dei singoli non devono macchiare un’intera comunità». Poi ha aggiunto: «Sono i benvenuti». In vico San Bernardo sono stati lanciati barattoli di vetro contro alcuni alpini, uno ha denunciato di essere stato circondato da persone che gli hanno rubato la penna.

Erboi taggiæ in corso Podestà, a Procua a î sexisce tutti apreuvo à un espòsto

A Procua de Zena a l’à sexio 38 pin in corso Podestà dòppo un espòsto presentou da l’assoçiaçion Italia Nostra e da un gruppo de rescidenti pe destruçion de bellesse da natua e violaçion do còdiçe di ben de cultua e do paisaggio. L’açion a l’é vegnua apreuvo a-o taggio de doî erboi a-i 4 de mazzo, deçiso da-o Commun perché e ciante, dòppo ciù preuve, ean stæte clascificæ à reisego de deruo, comme l’ea za capitou a-i 15 de marso. De assoçiaçioin ecologiste aivan inandiou unna protesta con l’accusa: «Pâ che l’amministraçion a no veugge imprende da-i erroî do passou». In vista do Radun di Arpin, tra l’atro con poscibile tempo grammo, o Commun o l’à misso di rastelli.

Traduçion italiaña

Alberi abbattuti in corso Podestà, la Procura li sequestra tutti dopo un esposto

La Procura di Zena ha sequestrato 38 pini in corso Podestà a seguito di un esposto presentato dall’associazione Italia Nostra e da un gruppo di residenti per distruzione di bellezze naturali e violazione del codice dei beni culturali e paesaggistici. L’azione è seguita all’abbattimento di due alberi il 4 maggio, deciso dal Comune perché le piante, dopo molteplici accertamenti, erano state classificate a rischio di crollo, come già accaduto il 15 marzo. Le associazioni ecologiste avevano organizzato una protesta con l’accusa: «Sembra che l’amministrazione non voglia imparare dagli errori del passato». In vista dell’Adunata degli Alpini, tra l’altro con possibile maltempo, il Comune ha installato delle transenne.

Liguria capitale de l’intelligensa artifiçiale, 5mia adexoin a-o protocòllo d’inteisa

Ciù de 5mia açiende e soggetti do mondo do spòrt e da coltua an firmou o protocòllo d’inteisa promòsso da Liguria Digitale pe rende Zena capitale de l’high performance computing e de unna gigafactory de l’intelligensa artifiçiale. E firme son passæ da-i 13 de partensa a 5.134 inte pöche settemañe. L’intençion a l’é quella de rende a Liguria un çentro meistro à livello europeo. «O l’é un exito stramesuou – o commento do prescidente da Region Marco Bucci –. No beseugna fermâse a-o numeo, ma ammiâ a-a varsciua de unna communitæ larga e unia ch’a veu investî inte l’avvegnî». Pe-a scindica Silvia Salis a saià unna «leva pe creâ de neuve opportunitæ pe-i zoeni che veuan arrestâ à Zena»

Traduçion italiaña

Liguria, capitale dell’intelligenza artificiale, 5mila adesioni al protocollo d’intesa

Oltre 5mila aziende e soggetti ​​del mondo dello sport e della cultura hanno firmato il protocollo d’intesa promosso da Liguria Digitale per fare di Genova la capitale dell’high performance computing e di una gigafactory dell’intelligenza artificiale. Le firme sono passate da 13 a 5.134 in poche settimane. L’obiettivo è rendere la Liguria un polo d’eccellenza a livello europeo. «È un risultato enorme – commenta il presidente della Regione Marco Bucci –. Non bisogna fermarsi al numero, ma guardare al valore di una comunità ampia e unita che vuole investire nel futuro». Per la sindaca Silvia Salis sarà una «leva per creare nuove opportunità per i giovani che vogliono restare a Genova».

E notiçie da l’Italia

Delitto de Garlasco, a Procua a l’à serrou l’investigaçion: o Sempio tegnuo corpeive

A Procua de Pavia a l’à serrou a segonda investigaçion in sciô delitto de Garlasco: o Andrea Sempio o l’é accaxonou d’avei ammassou a Chiara Poggi «con grammiçia» perché a l’aiva refuou un avvexinamento. Dòppo passou 19 anni da l’assascinio, o galante Alberto Stasi, stæto condannou à 16 anni, o porrieiva tornâ in libertæ. O Sempio o no l’à respòsto a l’interrogatöio donde se ghe contestava o contegnuo de çerte interçettaçion, inte uña de quæ o l’ammette d’avei visto o video ch’o mostra a vittima in intimitæ co-o Stasi. Pe-a defeisa o gh’aiva scì unn’ossescion pe unna figgia, ma a no l’ea a Chiara. Seu fræ Marco Poggi, amigo do Sempio sentio comme testimònio, o l’à defeiso fin à l’urtimo.

Traduçion italiaña

Delitto di Garlasco, la Procura ha chiuso le indagini: Sempio ritenuto colpevole

La Procura di Pavia ha chiuso la seconda inchiesta sul delitto di Garlasco: Andrea Sempio è accusato di aver ucciso Chiara Poggi «con crudeltà» perché lei aveva rifiutato le sue avance. A 19 anni dall’omicidio, il fidanzato Alberto Stasi, condannato a 16 anni, potrebbe tornare in libertà. Sempio non ha risposto all’interrogatorio in cui gli veniva contestato il contenuto di alcune intercettazioni, in una delle quali ammette di aver visto il video che mostrava la vittima in atteggiamenti intimi con Stasi. Per la difesa aveva effettivamente un’ossessione per una ragazza, ma non era Chiara. Suo fratello Marco Poggi, amico di Sempio e sentito come testimone, lo ha difeso fino all’ultimo.

Biennale de Veneçia, polemiche anche da l’Euröpa pe-a presensa da Ruscia

Settemaña de polemiche in Italia pe-a presensa da Ruscia a-a Biennale de Veneçia. «L’arte a l’é ciù potente d’ògni prepotensa e a scassa e catastrofe», o l’à dito o prescidente de l’espoxiçion internaçionale Pietrangelo Buttafuoco. L’Union europea a l’à attaccou pe voxe da viçeprescidente da Commiscion Henna Virkkunen: «Ch’a no segge unna vedriña pe Mosca». Bruxelles a l’à scrito a-o governo pe avvertî che o finançiamento de doî mioin o l’é à reisego de scentâ. De feua, a protesta do movimento Pussy riot e de Femen, e attiviste feministe contra o Putin. A ministra da Coltua ucraina a l’à commentou: «A Ruscia a l’addeuvia l’arte pe dâse recatto». Pe contra, vinti padiggioin an serrou a-i 8 de mazzo pe protesta contra a presensa d’Isræle.

Traduçion italiaña

Biennale di Venezia, polemiche anche dall’Europa sulla presenza della Russia

Settimana di polemiche in Italia sulla presenza della Russia alla Biennale di Venezia. «L’arte è più potente di ogni prepotenza e spazza via le catastrofi», ha dichiarato il presidente dell’esposizione internazionale Pietrangelo Buttafuoco. L’Unione europea ha attaccato per voce della vicepresidente della Commissione Henna Virkkunen: «Non sia una vetrina per Mosca». Bruxelles ha scritto al governo per avvertire che i due milioni di finanziamenti rischiano di sparire. All’esterno, proteste del movimento Pussy Riot e Femen, le attiviste femministe contro Putin. Il ministro della Cultura ucraino ha commentato: «La Russia usa l’arte per ripulirsi». D’altra parte, venti padiglioni sono rimasti chiusi l’8 maggio in segno di protesta contro la presenza di Israele.

Addio a-o Alex Zanardi, un campion e un scimbolo a-o de là do spòrt

L’é mòrto de 59 anni o Alex Zanardi, pilòtto de Formula 1 e dapeu campion do spòrt paralimpico. Do 2001 l’açidente in Germania apreuvo a-o quæ o l’à patio l’amputaçion de gambe, dapeu o passaggio à l’handbike donde o l’à guägno quattro medagge d’öo e doe d’argento. Do 2020 unn’atra bòtta contra un camio. «Un ponto de referensa ch’o va a-o de là do spòrt», l’à arregordou o prescidente da Repubrica Sergio Mattarella. Miggiæa de persoñe à Padova pe-o merteuio: tra de loiatri amixi, tifoxi, atri campioin comme a Bebe Vio e o Alberto Tomba. «No serve ëse lê pe avei unna vitta mäveggiosa», e poule do figgio Niccolò.

Traduçion italiaña

Addio ad Alex Zanardi, campione e simbolo al di là dello sport

È morto a 59 anni Alex Zanardi, pilota di Formula 1 e in seguito campione paralimpico. Nel 2001 l’incidente in Germania a seguito del quale subì l’amputazione delle gambe, poi il passaggio all’handbike, disciplina in cui vinse quattro medaglie d’oro e due d’argento. Nel 2020 un altro incidente contro un camion. «Un punto di riferimento che va oltre lo sport», lo ha ricordato il presidente della Repubblica Sergio Mattarella. Migliaia di persone a Padova per il funerale: tra di loro amici, tifosi, altri campioni come Bebe Vio e Alberto Tomba. «Non serve essere lui per avere una vita meravigliosa», le parole del figlio Niccolò.

E notiçie da-o mondo

Guæra in Iran, neuvo cian de paxe da-i Stati Unii co-e menasse do Trump

I Stati Unii an mandou à l’Iran un neuvo cian de paxe in 14 ponti pe mette fin a-a guæra e stabilî unna cornixe pe de negoçiaçioin ciù into menuo. L’accòrdio o prevedde l’impegno à unna pösa in sce l’inricchimento de l’uranio, a luxe verde de Washington a-o retio de sançioin e l’avertua de Hormuz. «Se Teheran a no l’açetta, i bombezzi saian ancon ciù potenti», o l’à menassou o Trump. A tregua a l’arresta sciù, ma i Stati Unii an dito d’avei interçettou di attacchi iranien e d’avei respòsto pe defeisa. Intanto, dòppo o neuvo attacco do Trump a-o pappa Lion, o segretäio de Stato Marco Rubio o l’é anæto in vixita in Vatican e dapeu da-a prescidente do Conseggio italiaña Giorgia Meloni.

Traduçion italiaña

Guerra in Iran, nuovo piano di pace dagli Stati Uniti con le minacce di Trump

Gli Stati Uniti hanno inviato all’Iran un nuovo piano di pace in 14 punti per porre fine alla guerra e definire un quadro per negoziati più dettagliati. L’accordo prevede l’impegno a sospendere l’arricchimento dell’uranio, il via libera di Washington alla revoca delle sanzioni e l’apertura di Hormuz. «Se Teheran non accetta, i bombardamenti saranno ancora più potenti», ha minacciato Trump. La tregua rimane in vigore, ma gli Stati Uniti hanno affermato di aver intercettato attacchi iraniani e di aver risposto per difendersi. Nel frattempo, dopo il nuovo attacco di Trump a papa Leone, il segretario di Stato Marco Rubio ha visitato il Vaticano e poi la presidente del Consiglio italiana Giorgia Meloni.

O mondo in anscietæ pe l’hantavirus, l’Oms: «A no l’é unna pandemia»

L’hantavirus o mette poia à tutto o mondo. Dòppo i trei mòrti à bòrdo de unna nave olandeise partia da Ushuaia in Argentiña, l’Organizzaçion mondiale da sanitæ a l’à dæto l’allarme pe unna poscibile trasmiscion tra di umoen, ma a l’à dito ascì che pe-o momento a no l’é unna neuva pandemia. Visto o periodo d’incubaçion, se pensa che a primma infeçion a segge stæta contræta feua da nave, dapeu un passaggê o l’à afferrou a moutia a-i atri. A nave a l’é in arrivo a-e Canäie e i turisti che gh’é in çimma saian portæ torna a-i seu Paixi. L’Union europea a l’à attivou a proteçion çivile e vegnià stabilio de nòrme pe-a quänteña.

Traduçion italiaña

Il mondo in apprensione per l’hantavirus, l’Oms: «Non è una pandemia»

L’hantavirus fa paura a tutto il mondo. Dopo i tre decessi a bordo di una nave olandese in partenza da Ushuaia, in Argentina, l’Organizzazione mondiale della sanità ha lanciato l’allarme sulla possibile trasmissione tra umani, pur precisando che al momento non si tratta di una nuova pandemia. Dato il periodo di incubazione, si ritiene che il primo contagio sia avvenuto fuori dalla nave e che in seguito un passeggero abbia trasmesso la malattia ad altri. La nave è in arrivo alle Canarie e i turisti a bordo saranno rimpatriati. L’Unione europea ha attivato la protezione civile e verranno istituite norme per la quarantena.

Eleçioin locale in Gran Bretagna, o governo Starmer o l’é inte sbigge

O governo laburista do Keir Starmer o l’é in difficortæ dòppo a pesante desfæta inte eleçioin locale. O partio o l’à perso a meitæ di conseggê e a primma fòrsa a l’é vegnua Reform UK, a drita amiga do Trump do Nigel Farage. Inte çerti territöi o Starmer o l’é stæto battuo ascì da-e formaçioin ciù a-a scinistra. O premier britannico o l’à reconosciuo a desfæta «ben ben dua», comme s’accapiva za da-o primmo conto di voti. Un exito ch’o «fa mâ», o l’à deciarou piggiandose «a responsabilitæ» sensa çercâ de vittime da sacrificâ. Però o l’à azzonto: «Sto chì o no l’indebolisce a mæ determinaçion à realizzâ o cangiamento promisso» da-o governo.

Traduçion italiaña

Elezioni locali in Gran Bretagna, il governo Starmer è in affanno

Il governo laburista di Keir Starmer è in difficoltà dopo la pesante sconfitta alle elezioni locali. Il partito ha perso metà dei suoi consiglieri e la prima forza è diventata Reform UK, la destra trumpiana di Nigel Farage. In alcuni territori Starmer è stato sconfitto anche da formazioni più a sinistra. Il premier britannico ha riconosciuto la sconfitta «molto dura», già evidente dal primo conteggio dei voti. Un risultato che «fa male», ha dichiarato, assumendosi la «responsabilità» senza cercare capri espiatori. Tuttavia ha aggiunto: «Questo non indebolisce la mia determinazione a realizzare il cambiamento promesso» dal governo.