O Zinâ

Ediçion

E notiçie da-a Liguria

Crixi Amt, tenscion politica in scî taggi a-o serviçio: a Salis a convoca i cappi

A crixi de l’Amt, l’açienda de traspòrto pubrico de Zena, a l’é sempre ciù un ascado politico. I taggi previsti pe-e corriere an açeiso a protesta di amministratoî de l’entrotæra, contestâ però da-i cappi do Partio Democratico. O scindico de Campomòn, o Giancarlo Campora, o l’à lasciou e deleghe in Çittæ metropolitaña. Da l’incontro co-i scindacati l’é vegnuo feua de ipòtexi pe-o serviçio invernale da çittæ con 200 turni de meno e de linie ascurtie. Da-i muniçippi s’é levou ben fito di mogogni. A scindica Silvia Salis a l’à convocou i dirigenti de l’Amt. Oua o Commun o çerchià de contegnî i taggi, anche mettendoghe di atri dinæ.

Traduçion italiaña

Crisi Amt, tensioni politiche sui tagli al servizio: Salis convoca i dirigenti

La crisi di Amt, l’azienda di trasporto pubblico di Genova, si sta trasformando sempre più in una questione politica. I tagli previsti per le corriere hanno scatenato proteste da parte degli amministratori locali, contestate però dai vertici del Partito Democratico. Il sindaco di Campomorone, Giancarlo Campora, ha lasciato le deleghe in Città Metropolitana. Dall’incontro con i sindacati sono emerse ipotesi sul servizio invernale urbano con 200 turni in meno e linee accorciate. Dai municipi si sono levate ben presto voci di malcontento. La sindaca Silvia Salis ha convocato i dirigenti di Amt. Ora il Comune cercherà di contenere i tagli, anche investendo maggiori risorse.

Andeua, bagnin mòrto insemme à l’òmmo ch’o çercava de sarvâ

Tragedia into mâ d’Andeua a-i 25 d’agosto. Un bagnin e imprenditô de 62 anni, o Fabrizio Valente, o l’é mòrto insemme à un òmmo ch’o çercava de sarvâ, o piemonteise Luigi Fasano de 66 anni. Mez’oa avanti o s’ea bollou pe portâ à riva unn’atra persoña: fòscia pe caxon da stanchessa ammuggiâ o s’é sentio mâ e o l’é negou. I còrpi son stæti repiggiæ da di atri bagnin. «Unna persoña seria, un ch’o travaggiava ben ben», o regòrdo de un collega di bagni vexin. O prescidente da Federaçion italiaña de neuo o l’à propòsto de dâghe unna medaggia a-o valô. Çentanæa de persoñe gh’an dæto l’urtimo saluo a-o çemetëio de Zineua.

Traduçion italiaña

Andora, bagnino morto insieme all’uomo che cercava di salvare

Tragedia nel mare di Andora il 25 agosto. Un bagnino e imprenditore di 62 anni, Fabrizio Valente, è morto insieme a un uomo che stava cercando di salvare, il piemontese Luigi Fasano, di 66 anni. Mezz’ora prima si era tuffato per portare a riva un’altra persona: forse a causa della stanchezza accumulata si è sentito male ed è annegato. I corpi sono stati recuperati da altri bagnini. «Una persona seria, un gran lavoratore», ricorda un collega dello stabilimento balneare vicino. Il presidente della Federazione italiana nuoto ha proposto di conferirgli una medaglia al valore. Centinaia di persone gli hanno reso l’ultimo saluto al cimitero di Zinola.

Açidente in sce l’autostradda A32, mòrti doî zoeni rescidenti à Zena e Sant’Orçeise

Doî zoeni rescidenti à Zena e Sant’Orçeise son mòrti à l’arba di 28 d’agosto inte un açidente in sce l’autostradda A32, vexin à Susa. A seu machina à l’é finia contra e proteçioin e a s’é destruta. E vittime son o Federico Ferrari, de 22 anni, e o Mohammed Ez Zanzouni de 23, quello ch’o guiddava, pe-a reconstruçion di pompê e da poliçia stradale. No gh’é saieiva de atre vettue interessæ. Un terso zoeno de 21 anni, lê ascì de Zena, o l’é stæto portou à l’uspiâ Rivoli de Turin con de ferie lege. «Unna tragedia ch’a corpisce a communitæ, s’astrenzemmo vexin a-e famigge e a-i amixi», o commento do Commun.

Traduçion italiaña

Incidente sull’autostrada A32, morti due giovani residenti a Genova e Sant’Olcese

Due giovani residenti a Genova e Sant’Olcese sono morti all’alba del 28 agosto in un incidente sull’autostrada A32, nei pressi di Susa. La loro auto è finita contro il guardrail ed è andata distrutta. Le vittime sono Federico Ferrari, 22 anni, e Mohammed Ez Zanzouni, 23 anni, quest’ultimo alla guida, secondo la ricostruzione di vigili del fuoco e polizia stradale. Non sarebbero coinvolti altri veicoli. Un terzo giovane, 21 anni, anche lui di Genova, è stato trasportato all’ospedale Rivoli di Torino con ferite lievi. «Una tragedia che colpisce la comunità, ci stringiamo alle famiglie e agli amici», ha commentato il Comune.

E notiçie da l’Italia

Carburanti tròppo cäi, o governo o prolonga i sconti e o pensa à de neuve mesue

O governo o l’à prolongou o taggio de tasce in sciô gasòlio fin a-i 5 de settembre pe mette un fren a-a montâ di prexi. O provedimento o costià in scî 130 mioin d’euro, dinæ ch’arrivan da-e tasce pagæ da-i gruppi de l’energia. Ciù in là l’intençion a l’é quella d’instituî di sostëgni «selettivi in sciâ base do reddito», ma l’oppoxiçion a vorrieiva de neuve tasce in scî guägni straordenäi de compagnie petrolifere. Segondo o conto do Codacons, i italien spendian 430 mioin de ciù into tornâ inderê da-e vacanse. A benziña a l’é arrivâ da tutte e parte à 2 euro a-o litro, o diesel à 2,20 in autostradda, neuvo record stòrico da-o 2022.

Traduçion italiaña

Carburanti troppo cari, il governo estende gli sconti e valuta nuove misure

Il governo ha prorogato fino al 5 settembre il taglio delle accise sul gasolio per frenare l’aumento dei prezzi. Il provvedimento costerà circa 130 milioni di euro, provenienti dalle tasse pagate dai gruppi energetici. Per il futuro l’obiettivo è quello di istituire sussidi «selettivi basati sul reddito», ma l’opposizione vorrebbe nuove tasse sugli extraprofitti delle compagnie petrolifere. Secondo i calcoli di Codacons, gli italiani spenderanno 430 milioni in più per il rientro dalle vacanze. La benzina ha raggiunto i 2 euro al litro ovunque, il diesel i 2,20 euro in autostrada, un nuovo record storico dal 2022.

O Ranucci scorrio da Report, arriva Presutti e Piervincenzi: i giornalisti in sollevo

A Rai a l’à mandou via o Sigfrido Ranucci da-a conduçion de Report. A-o posto do giornalista, corpio da l’attentato pe-o quæ o Valter Lavitola o l’é stæto arrestou, arriva a Giulia Presutti e o Daniele Piervincenzi: «Tutti doî an guägno a seleçion pe giornalisti profescionisti», o commento de l’açienda. Ma i correspondenti stòrichi da trasmscion protestan e se dixan pronti à anâsene: «Deçixon ch’a no se peu açettâ». O mæximo Ranucci o l’à commentou: «Persoñe che mortifican a profescionalitæ de chi l’à fæto a stöia de Report». Doî di quattro òmmi accaxonæ d’avei compio l’attentato, o Pellegrino D’Avino e o Antonio Passariello, an respòsto à l’interrogatöio: an dito de conosce solo o Gomes Tavares e che lê o gh’à dito de mette unna bomba.

Traduçion italiaña

Ranucci via da Report, arrivano Presutti e Piervincenzi: giornalisti in rivolta

La Rai ha allontanato Sigfrido Ranucci dalla conduzione di Report. Al posto del giornalista, colpito dall’attentato per cui è stato arrestato Valter Lavitola, arrivano Giulia Presutti e Daniel Piervincenzi: «Entrambi hanno vinto la selezione per giornalisti professionisti», il commento dell’azienda. Ma gli storici inviati del programma protestano e si dicono pronti ad andarsene: «Decisione inaccettabile». Lo stesso Ranucci commenta: «Persone che mortificano la professionalità di chi ha fatto la storia di Report». Due dei quattro uomini accusati di aver compiuto l’attentato, Pellegrino D’Avino e Antonio Passariello, hanno risposto all’interrogatorio: hanno affermato di conoscere solo Gomes Tavares e che lui gli aveva detto di piazzare una bomba.

Figgeua no vaccinâ mòrta pe difterite, i genitoî indagæ denonçian i uspiæ

I genitoî da Anna Rosa Bartolotta, unna figgeua de quattr’anni mòrta à Palermo pe-a difterite, son indagæ pe ammassamento corposo. Aivan çernuo de no vaccinâla perché, segondo loiatri, pròpio unna vacciña a l’avieiva caxonou l’autiximo de un coxin. A Procua pe-i minoî a l’à comandou de verifiche de mascima premmua inte scheue da zöna nòrd de Palermo. Ma intanto i genitoî da picciña an presentou unna denonçia a-i trei uspiæ da çittæ che l’an cuâ da-i 13 a-i 19 d’agosto.

Traduçion italiaña

Bambina non vaccinata morta di difterite, i genitori indagati denunciano gli ospedali

I genitori di Anna Rosa Bartolotta, una bambina di quattro anni morta a Palermo di difterite, sono indagati per omicidio colposo. Avevano scelto di non vaccinarla perché, a loro avviso, proprio un vaccino avrebbe causato l’autismo di un cugino. La Procura per i minori ha disposto verifiche di massima urgenza nelle scuole della zona nord di Palermo. Nel frattempo, i genitori della bambina hanno sporto denuncia presso i tre ospedali cittadini che l’hanno curata dal 13 al 19 agosto.

E notiçie da-o mondo

Alluvion devastante in Nepal, çentanæa de mòrti e miggiæ de despersci

Un’alluvion devastante a l’à corpio o territöio a-o confin tra o Nepal e o Tibet. L’ægua a l’à portou via de stradde, di ponti e di paixi intreghi. O conto o l’é delongo in aggiornamento, ma se parla de çentanæa de mòrti e ciù de 2.400 despersci. Tra de loiatri anche trei italien, di quæ un de Rapallo. I soccorritoî travaggian sensa pösa co-a speransa de trovâ de gente scampæ inta bratta. L’exerçito nepaleise o l’é arriescio à sarvâ 350 louanti e rescidenti arrestæ imprexonæ inte un tunnel. Segondo de primme reconstruçioin, l’ægua a l’avieiva fæto vegnî zu un giassâ e un tòcco de montagna.

Traduçion italiaña

Alluvione devastante in Nepal, centinaia di morti e migliaia di dispersi

Un’alluvione devastante ha colpito il territorio al confine tra Nepal e Tibet. L’acqua ha spazzato via strade, ponti e interi villaggi. Il bilancio è in continuo aggiornamento, ma si parla di centinaia di morti e oltre 2.400 dispersi. Tra le vittime anche tre italiani, uno dei quali originario di Rapallo. I soccorritori lavorano senza sosta nella speranza di trovare persone sopravvissute nel fango. L’esercito nepalese è riuscito a trarre in salvo 350 tra operai e residenti rimasti intrappolati in un tunnel. Secondo alcune delle prime ricostruzioni, l’acqua avrebbe fatto crollare un ghiacciaio e una porzione di montagna.

A Ruscia a menassa di attacchi in Gran Bretagna, o Regno Unio o s’inandia

A Ruscia a l’à menassou a Gran Bretagna d’attacchi a-e base militare comme repicca pe-i armamenti fornii à l’Ucraina e addeuviæ contra i stabilimenti e e infrastruttue. A portavoxe do ministëio de l’Estranxeo de Mosca a l’à dito che se porrieiva corpî «quæsesegge obiettivo militare in Ucraina e in de feua». O Regno Unio o l’aggiorna o cian de defeisa e o l’invita i çitten a fâ provixon d’ægua. O Trump o l’à asseguou: «Ò avuo di boin descorsci co-o Putin, o no l’attacchià di territöi Nato». O prescidente ruscio o l’aiva bocciou o cian de paxe do Zelensky con unna zöna franca gestia da di atri.

Traduçion italiaña

La Russia minaccia attacchi in Gran Bretagna, il Regno Unito si prepara

La Russia ha minacciato la Gran Bretagna con attacchi alle basi militari in rappresaglia per le armi fornite all’Ucraina e utilizzate contro impianti e infrastrutture. La portavoce del ministero degli Esteri russo ha affermato che «qualsiasi obiettivo militare in Ucraina e altrove» potrebbe essere colpito. Il Regno Unito aggiorna il piano di difesa e invita i cittadini a fare scorta d’acqua. Trump ha assicurato: «Ho avuto buoni colloqui con Putin, non attaccherà i territori della Nato». Il presidente russo aveva bocciato il piano di pace di Zelensky con una zona franca gestita da terzi.

Zoeni dependenti da-i social, a Meta a pattezza e paga 17 miliardi de dòllari

A Meta a l’à açettou de pagâ fin à 17,1 miliardi de dòllari inte un pattezzamento co-i Stati americhen che l’an accaxonâ d’avei fæto nasce unna dependensa da-i social media tra i zoeni. A soçietæ a l’à concordou d’impoñe di limiti pe-a giornâ e di blòcchi de neutte pe-i minoî, e de potençiâ i scistemi de contròllo de l’etæ pe impedî de vedde di contegnui che no van ben. Con tutto, no gh’é nisciuña ammiscion de corpa da parte de l’açienda do Zuckerberg. Intanto o Bill Gates, o fondatô de Microsoft, o l’à dæto l’allarme in sce l’intelligensa artifiçiale: «I pòsti de travaggio son à reisego».

Traduçion italiaña

Giovani dipendenti dai social, Meta patteggia e paga 17 miliardi di dollari

Meta ha accettato di pagare fino a 17,1 miliardi di dollari in un patteggiamento con gli Stati americani che l’hanno accusata di aver creato una dipendenza dai social media tra i giovani. La società ha accettato di imporre limiti di accesso giornalieri e blocchi notturni per i minori, e di potenziare i sistemi di verifica dell’età per impedire la visualizzazione di contenuti inappropriati. Tuttavia, non vi è stata alcuna ammissione di colpa da parte dell’azienda di Zuckerberg. Nel frattempo Bill Gates, il fondatore di Microsoft, ha lanciato l’allarme sull’intelligenza artificiale: «I posto di lavoro sono a rischio».